मुंबई : रामनाथ कोविंद यांची राष्ट्रपतिपदी निवड झाल्याबद्दल महाराष्ट्र प्रदेश भाजप अनुसूचित जाती मोर्चाच्या वतीने आनंदोत्सव साजरा करण्यात आला. या निमित्ताने लाडूवाटप करण्यात आले. हा कार्यक्रम भाजपच्या दादर येथील वसंत स्मृती कार्यालयात झाला.
या वेळी मोर्चाच्या वतीने पंतप्रधान नरेंद्र मोदी, राष्ट्रीय अध्यक्ष अमित शहा, मुख्यमंत्री देवेंद्र फडणवीस, तसेच प्रदेशाध्यक्ष रावसाहेब दानवे यांचे आभार मानण्यात आले. ‘एका सामान्य कार्यकर्त्याला राष्ट्रपती बनविण्याची किमया केवळ भाजपमध्येच होऊ शकते,’ असे विधान मोर्चाचे राष्ट्रीय महामंत्री रमेशचंद्र रत्न यांनी याप्रसंगी केले. सामाजिक न्यायमंत्री दिलीप कांबळे यांनीही या वेळी मनोगत व्यक्त केले. मोर्चाचे प्रदेशाध्यक्ष सुभाष पारधी यांनी राज्यातील अनुसूचित समाजाच्या वतीने त्यांचे अभिनंदन केले.
या वेळी माजी खासदार भाऊसाहेब वाघमारे, राष्ट्रीय चिटणीस विजय गोवळकर, राष्ट्रीय कार्यकारिणी सदस्य अशोक खरटमल, मुंबई अध्यक्ष शरद कांबळे, मोर्चाचे महाराष्ट्रातील सर्व जिल्हाध्यक्ष, जिल्हा प्रभारी, प्रदेश कार्यकारिणी सदस्य मोठ्या संख्येने उपस्थित होते.
सरचिटणीस सुखदेव अडागळे यांनी प्रास्ताविक केले. अशोक कानडे यांनी सूत्रसंचालन केले, तर चंद्रकांत हिवराळे यांनी आभार मानले.